ઉત્તરાખંડમાં ચારધામ યાત્રા શરૂ કરવાની તૈયારીઓ ચાલી રહી છે. બીજી તરફ, વિશ્વના સૌથી ઊંચા સ્થિત ગુરુદ્વારા હેમકુંડ સાહિબના દરવાજા ખોલવાની અને બંધ કરવાની તારીખ પણ આવી ગઈ છે.
પ્રાપ્ત માહિતી અનુસાર, તાજેતરમાં ગુરુદ્વારા શ્રી હેમકુંડ સાહિબ મેનેજમેન્ટ ટ્રસ્ટના અધ્યક્ષ નરેન્દ્રજીત સિંહ બિન્દ્રા ઉત્તરાખંડના મુખ્ય સચિવ રાધા રતુરીને મળ્યા હતા અને તેમને ગુરુદ્વારા ખોલવાની તારીખો વિશે માહિતી આપી હતી.
તમને જણાવી દઈએ કે, હાલમાં હેમકુંડ સાહિબ ગુરુદ્વારા અને તેની આસપાસના વિસ્તારોમાં ભારે હિમવર્ષા થઈ રહી છે. ગુરુદ્વારા અને આજુબાજુનો આખો વિસ્તાર લગભગ 5 થી 8 ફૂટ ઉંચા બરફમાં દટાયેલો છે. હેમકુંડ સાહિબ ગુરુદ્વારા ખોલવાના લગભગ એક મહિના પહેલા, આર્મી ઓફિસરો આ વિસ્તારમાંથી બરફ હટાવવાની જવાબદારી પોતાના માથે લે છે, જેથી અહીં આવતા શ્રદ્ધાળુઓ માટે રસ્તો સાફ કરી શકાય.
આ વર્ષે હેમકુંડ સાહિબ ગુરુદ્વારાના દરવાજા 25મી મેના રોજ ખુલશે અને 10મી ઓક્ટોબર 2024ના રોજ બંધ થઈ જશે. દર વર્ષે શીખ સમુદાયના લાખો લોકો હેમકુંડ સાહિબની મુલાકાતે આવે છે. મીડિયા રિપોર્ટ્સ અનુસાર, વર્ષ 2022માં લગભગ 2.4 લાખ અને 2023માં 1.7 લાખ શ્રદ્ધાળુઓ હેમકુંડ સાહિબના ચડ્યા હતા.
